Թատերային պայմանականությունը՝ ի օգուտ Ձեր կրթական ծրագրի

Մենք հիանալի գիտակցում ենք, թե որքան կարեւոր է գործնական գիտելիքի դերը ուսուցողական գործընթացում, սակայն, միշտ չէ, որ կարողանում ենք մեր լսարանին տալ նման ծրագրերում ընդգրկվելու հնարավորություն։ Այնինչ, շատ հաճախ մենք պարզապես մոռանում ենք, որ այդ հնարավորությունը գրեթե միշտ առկա է։ Չէ՞ որ հանձինս մեր լսարանի, մենք ունենք մի հրաշալի սիրողական թատերախումբ։

Մեր կյանքի տարբեր դրվագներ կարող են լինել որքան իրական, նույնքան էլ՝ պայմանական։ Այդ թվում նաեւ՝ Ձեր ուսուցողական ծրագրին առնչվող որեւէ դրվագ։ Եկեք պատկերացնենք, որ այդ դրվագը փոքրիկ բեմականացում է, որի դերասանները հենց Ձեր լսարանի անդամներն են։ Նրանք ներկայացնում են իրավիճակը, իսկ այնուհետեւ խրախուսում մյուսներին ներգրավվել գործողություններին։ Այսպիսով՝ փոքրիկ բեմականացումը վերածվում է գործնական կրթական հարթակի։

Թատերային պայմանականությունը, որպես Ձեր ուսուցողական ծրագրի կարեւոր յուրահատկություն, ունի մի շարք առավելություններ։ Այստեղ չկան իրական մեղավորներ ու անմեղներ, նույնիսկ դժվարին իրավիճակները աննկատ վերածվում են ինքնատիպ զվարճանքի, իսկ միջավայրը պայմանական է, ուստի եւ՝ ապահով։ Հավելե՛ք մասնակցային թատրոնը Ձեր ուսուցողական նախաձեռնություններին՝ դարձնելով դրանք ժամանցային, ինտերակտիվ ու առավել ազդեցիկ։

 Նմանատիպ ծրագրերի բազմաթիվ օրինակներ կարող եք տեսնել Հայաստանում ինտերակտիվ թատրոնի առաջատար «Փոփոխությունների թատրոնի» գործնեությունը ներկայացնող ֆոտոգրքում՝ հետեւելով այս հղմանը։