Քաղաքացիական կրթություն՝ ինտերակտիվ ու շատ զվարճալի

Այսօրվա դպրոցականները մեր ներկա ու ապագա քաղաքացիներն են։ Շատ շուտով նրանք նույնպես իրավունք կստանան մասնակցել իրենց երկրի կառավարմանը՝ ընտրությունների միջոցով։ Սակայն որքանո՞վ են նրանք պատրաստ որպես ապագա ընտրողներ եւ գիտակցու՞մ են արդյոք այդ ամենի կարեւորությունը։ Եթե ցանկանում եք Ձեր աշակերտներին տալ գործնական գիտելիքներ այս ոլորտում, փորձեք Ձեր ուժերով բեմադրել մի փոքրիկ ինտերակտիվ ներկայացում, որտեղ երեխաների գլխավոր խնդիրը կլինի ժողովրդավարական ճանապարհով ընտրություն կատարելը։

 Ձեզ հարկավոր չէ բարդ կառուցվածք ունեցող ներկայացում։ Ազատ թողեք Ձեր երեւակայությունը եւ պարզապես ներկայացրեք երեխաների համար ծանոթ (նրանց հուզող) մի իրավիճակ կամ խնդիր, որը լուծելու համար առաջարկված մի քանի տարբերակներից հարկավոր է ընտրել միայն մեկը։ Բնականաբար, կընտրվի առավել շատ ձայներ ստացած տարբերակը։ Պատրաստեք պարզ ու գրավիչ քվեաթերթիկներ, որոնց միջոցով Ձեր աշակերտները կկատարեն իրենց ընտրությունը։

Մինչ ընտրություններին անցնելը, ներկայացրե՛ք առաջարկված բոլոր տարբերակների առավելություններն ու թերությունները։ Թող երեխաները մտածեն, քննարկեն ու կատարեն իրենց ընտրությունը։ Այնուհետեւ կազմակերպեք ձայների հաշվարկ։ Ապահովեք Ձեր լսարանի ակտիվ մասնակցությունը նաեւ այս փուլում։ Նույնիսկ եթե հաշվարկը երկար տեւի, նրանք չեն ձանձրանա, քանի որ իրենց կարեւոր ու պատասխանատու մասնակցությունն են ունեցել այդ գործում։

 

 Լսարանի մասնակցությունը կարեւոր է ցանկացած ուսուցողական գործընթացքում, առավել եւս քաղաքացիական կրթության ոլորտում։ Ահա թե ինչու է ինտերակտիվ թատրոնը շատ արդյունավետ նմանատիպ ուսուցողական ծրագրերի համատեքստում։ Այստեղ ամեն ինչ որոշում է հանդիսատեսը։