Մի՛ խանգարեք, թող երեխաները «աղմկեն»

Լռություն, դասը սկսվում է։ Չենք զրուցում, չենք խոսում, այլ լուռ լսում ենք դասը։ Եթե ուզում եք ինչ-որ բան ասել, բարձրացնում եք ձեռքը եւ խոսում միայն թույլտվություն ստանալուց հետո։ Թերեւս, շատերիս ծանոթ իրավիճակ է։ Շատ դեպքերում հենց այսպես ենք պատկերացնում ուսումնական գործընթացը։ Իհարկե, լռությունը կարեւոր է, իսկ դասը սերտելու համար հարկավոր է կենտրոնանալ։ Սակայն, եթե որոշել եք իրականացնել ուսումնազվարճանքի ծրագիր եւ Ձեր դասը աշակերտների համար վերածել յուրատեսակ ուսումնական ժամանցի, մոռացե՛ք վերոնշյալ կանոնները։

Անկախ նրանից, թե ինչ բնույթի ուսումնազվարճանքի ծրագիր եք իրականացնում, հիշեք՝ այստեղ ամենից կարեւորը ուսուցանվողների ազատ ու անկաշկանդ շփումն է Ձեր եւ միմյանց հետ։ Եթե մտավախություն ունեք, որ աշակերտները կաղմկեն ու ոչինչ չի ստացվի, պարզապես փոխեք Ձեր մոտեցումը։ Կառուցեք հետաքրքիր, գրավիչ եւ մասնակցային ծրագիր, որին Ձեր աշակերտները կմասկացեն խանդավառությամբ։Եթե Ձեր ծրագիրն իսկապես հետաքրքիր է ու մասնակցային, դուք հաճելիորեն կզարմանաք՝ տեսնելով, թե որքան կառավարելի է աշակերտների «աղմուկը» (առանց որեւէ կոպիտ միջամտության)։ Այստեղ երեխաների ակտիվությունն ու «աղմուկը» Ձեր հաջողության գրավականն են։ Մնում է միայն աննկատ վերահսկել ծրագրի ընթացքը։

Վստահ եղեք, որ աշակերտները կգնահատեն Ձեր ջանքերը, իսկ դասը կլինի տպավորիչ։ Թատերային ուսումնազվարճանքի բազմաթիվ հաջողված օրինակներ կարելի է գտնել մեր նոր պորտֆոլիոյում՝ հետեւելով այս հղմանը։